Marrëdhënia mes kompanisë amerikane të inteligjencës artificiale Anthropic dhe Pentagon në SHBA u fut në një krizë të rëndë. Anthropic, i njohur për modelet e tij AI me fokus të fortë mbi sigurinë dhe etikën, kishte nënshkruar një kontratë deri në 200 milionë dollarë për të ofruar modelet e saj të inteligjencës artificiale për përdorim nga Pentagoni që nga korriku i vitit 2025. Por marrëveshja u trondit kur Pentagon kërkoi që kompania të hiqte kufizimet e vendosura në modelet e saj, kryesisht ato që ndalojnë përdorimin e AI për raportim masiv të qytetarëve amerikanë dhe për krijimin earmëve autonome pa ndërhyrje njerëzore.
CEO i Anthropic, Dario Amodei, deklaroi publikisht se këto kufizime janë “vija e kuqe” që kompania nuk do t’i kalojë as nën presionin e Pentagonit. Ai argumentoi se përdorimi i pa kontrolluar i AI në këto fusha jo vetëm që cenon vlerat demokratike, por shkon përtej asaj që teknologjia është gati të bëjë në mënyrë të sigurt. Përkundër përpjekjeve të Pentagonit për të zbutur kushtet, Anthropic tha se versionet e reja të kontratës nuk bënin progres real në mbrojtjen e kufizimeve dhe se gjuha ligjore e re mund t’i injoronte ato në praktikë.
Reagimi i Pentagonit ishte i menjëhershëm dhe ashpër. Sekretari i Mbrojtjes, Pete Hegseth, i dha kompanisë një ultimatum deri më 27 shkurt për t’u pajtuar me kërkesat, duke kërcënuar të anulonte kontratën dhe ta shënjestronte Anthropic si një “rrezik të zinxhirit të furnizimit”, një klasifikim që zakonisht përdoret për kompani me lidhje me vende të huaja armiqësore. Nëse negociatat dështonin, Pentagon pati gjithashtu në konsideratë përdorimin e Ligjit për Prodhimin e Mbrojtjes për të detyruar ndihmën e kompanisë.
Më tej, administrata i ndaloi të gjitha agjencitë federale të përdorin produktet e Anthropic, dhe shumë kompani që punojnë me Pentagonin tani duhet të zgjidhin kontratat e tyre. Anthropic reagoi duke e quajtur këtë vendim “pa precedent” dhe njoftoi se do ta sfidonte atë në gjykatë.
Megjithatë, zgjidhja e këtij problemi u gjet shumë shpejt. Drejtori ekzekutiv i OpenAI, Sam Altman, njoftoi të premten vonë se kompania ka nënshkruar një marrëveshje me Pentagonin që mjetet e saj të inteligjencës artificiale të përdoren në sistemet e klasifikuara të ushtrisë.
Në një postim në X, Altman tregon: “Do të ndërtojmë masa mbrojtëse teknike për të siguruar që modelet tona të sillen siç duhet, gjë që e dëshironte edhe DoW. Do të vendosim FDE për të ndihmuar me modelet tona dhe, për të rregulluar sigurinë e tyre, do t’i vendosim vetëm në rrjetet “cloud“.”
