Lehtësitë që ofron teknologjia moderne kanë ndryshuar rrënjësisht jetën e përditshme, duke na kursyer kohë dhe përpjekje. Megjithatë, sipas psikiatres së Stanfordit, Anna Lembke, ky komoditet ka edhe një kosto, pasi njerëzit sot kanë gjithnjë e më pak dëshirë për aktivitete që kërkojnë përpjekje. Ushtrimet fizike, mësimi i një aftësie të re apo përballja me sfida mendore shpesh perceptohen si barrë, jo si kënaqësi.
Duke folur në podcastin “Diary Of A CEO”, Lembke thekson se truri mund të stërvitet për t’i bërë dhe për t’i pëlqyer këto sfida, por çelësi është planifikimi i qëllimshëm dhe i detajuar paraprak. Nëse vendimi për të bërë diçka të vështirë lihet për momentin e fundit, zakonisht zgjidhet rruga më e lehtë. Ndërsa një plan i bërë një ditë më pare, për shembull, orari i zgjimit dhe përgatitja për palestër, rrit ndjeshëm gjasat që aktiviteti të realizohet.
Lembke shpjegon se kjo strategji funksionon sepse na ndihmon të frenojmë dëshirat afatshkurtra dhe të fokusohemi te objektivat afatgjata, njësoj si kur planifikojmë vaktet ose veshjen për të kursyer kohë. Një tjetër element i rëndësishëm është përgjegjësia sociale. Studimet tregojnë se njerëzit arrijnë më shumë kur kanë një partner ose grup me të njëjtat synime. Aktivitetet si palestra, grupet e studimit apo sfidat kolektive e bëjnë më të lehtë përballimin e vështirësive.
Lembke përdor metaforën e një peshoreje mes kënaqësisë dhe dhimbjes: përpjekja fillestare shton “peshë” në anën e dhimbjes, por këmbëngulja sjell një shpërblim më të qëndrueshëm dopaminik. Ajo këshillon gjithashtu durim, duke theksuar se progresi, edhe kur nuk është perfekt, mbetet progres.
