Meta po vazhdon strategjinë e Mark Zuckerberg për të rritur “ndikimin kulturor” të Facebook, duke sjellë një sërë përditësimesh që synojnë thjeshtimin e aplikacionit dhe përmirësimin e mënyrës së krijimit të përmbajtjes. Ndryshimet e reja përfshijnë mënyra të reja shikimi dhe ndërveprimi me fotot, duke e bërë përvojën më të ngjashme me Instagram. Kur një përdorues publikon disa foto njëherësh, ato do të shfaqen në një rreshtim të ri, ndërsa tani fotot mund të pëlqehen duke klikuar 2 herë mbi to.
Meta po ridizenjon gjithashtu procesin e krijimit të Stories dhe postimeve në Feed, duke vendosur mjetet më të përdorura, si shtimi i muzikës dhe etiketimi i miqve, në pozicione më të dukshme dhe më të lehta për t’u gjetur. Kërkimi do të jetë më vizual dhe më i “zhytur”, me rezultatet që do të shfaqin më shumë përmbajtje në një paraqitje që mbështet të gjitha format, nga fotot te videot. Kompania po teston edhe mënyra të reja për të parë foto dhe video në ekran të plotë pa humbur pozicionin në rezultatet e kërkimit.
Përveç këtyre, Facebook po shton opsione për t’i treguar pse një postim nuk është i rëndësishëm për ju, një hap drejt rritjes së kontrollit të përdoruesve mbi algoritmin. Kjo vjen pasi Meta ka prezantuar veçori të ngjashme për Instagram dhe Threads, duke premtuar se gjatë muajve të ardhshëm do të ofrojë më shumë mënyra personalizimi të Feed në Facebook.
Kompania ka prezantuar edhe funksione të tjera, si një menu të ridizenjuar dhe një eksperiencë më të thjeshtuar të komenteve. Meta thekson se këto ndryshime janë vetëm faza e parë për ta bërë Facebook më pak të ngarkuar dhe më të lehtë për t’u përdorur, me përditësime të tjera që priten vitin e ardhshëm.
