Sebastian Vettel, 4 herë kampion bote në Formula 1, ka lënë të hapur mundësinë e një rikthimi në pistë pas testimit të makinës Porsche 963 në WWC. Edhe pse u tërhoq nga F1 në fund të vitit 2022, ai vazhdon të përmendet për një rikthim të mundshëm, por deri tani ka shmangur çdo spekulim konkret.
Në podcastin Beyond the Grid, Vettel tha se ende nuk e ka përjashtuar plotësisht idenë për të garuar sërish. Testimi i Porsche 963 i kishte pëlqyer dhe ai e vlerësoi ndjesinë e garave të qëndrueshmërisë, duke theksuar dallimet pozitive me Formula 1. Ai përmendi se në F1 çdo pilot lufton vetëm për veten, ndërsa në WWC ka më shumë bashkëpunim, ndarje pune dhe ndjenjë ekipi.
Vettel shpjegoi se ishte në bisedime me Porsche, por ato nuk u konkretizuan. Megjithatë, ai shtoi se nëse shfaqet mundësia e duhur, është i hapur ta shqyrtojë. Edhe pse është i vetëdijshëm për moshën, tha se ndodhet në formë shumë të mirë fizike për shkak të pasionit për sportin.
Nga ana tjetër, Vettel është i kënaqur me jetën jashtë garave, duke pasur më shumë kohë për familjen dhe projektet e tij personale. Megjithatë, disa momente të F1 i mungojnë. Ai kujtoi se gjatë një vizite në Suzuka, gjatë kualifikimeve ndjeu dëshirën të ishte në makinë, duke e rikujtuar adrenalinën e pistës, sidomos në xhiro me pak karburant dhe goma të reja.
Sërish, ai pranoi se aspektet më të lodhshme të garimit, si menaxhimi i gomave apo ritmi me rezervuar të plotë, nuk i mungojnë. Vettel pranoi se emocionet e forta të pistës, sidomos në kualifikime në Monaco apo në duelet e ngushta, janë pjesët që i kujtohen më shpesh. Megjithatë, ai theksoi se tani gjen kënaqësi edhe në shumë gjëra të tjera përtej garave.
