Një thashethem i ri nga Kina sugjeron se Apple po zhvillon kasa mbrojtëse për iPhone të cilat janë të ndjeshme ndaj prekjeve. Sipas informatorit të njohur në Weibo, Instant Digital, kompania i ka zhvilluar këto kasa për modelet Pro që kanë të integruar drejtpërdrejt shtresa sensoresh të ndjeshëm ndaj prekjes.
Edhe pse detaje të tjera nuk u dhanë, patentat e mëparshme të Apple japin disa të dhëna. Një aplikim patentimi i vitit 2024 përshkruan një “kasë me input për pajisjen”, i cili funksionon si sipërfaqe kontrolli, jo thjesht si mbrojtje. Dokumenti shpjegon zona të ndjeshme ndaj prekjes, me sensorë kapacitivë ose me presion, që mund të zëvendësojnë funksionet e butonave fizikë. Kur kasa lidhet me iPhone, pajisja e kupton dhe e lejon të marrë kontrollin e butonave në prekje, shtypje ose gjeste rrëshqitjeje.
Patenta përfshin edhe mënyrën se si kasë komunikon me telefonin, përmes ndërfaqeve si NFC, duke lejuar identifikim dhe transmetim sinjalesh. Madje në disa versione përmendet edhe input biometrik, si integrimi i Touch ID në kasë për të zhbllokuar funksione të caktuara.
Ideja bëhet veçanërisht interesante në kontekstin e thashethemeve për një iPhone pa korniza, që pritet të vijë me modelin e 20-vjetorit në 2027. Dizajni i ri thuhet se do të ketë ekran që përkulet në të katër anët, duke lënë shumë pak hapësirë për butona mekanikë. Raportet se Apple po kalon drejt shtresave kapacitive dhe dizajnit të pandërprerë vizual e bëjnë një kasë interaktive një shoqërues logjik.
Ende mbetet e paqartë nëse ky zhvillim lidhet drejtpërdrejt me modelin e 20-vjetorit, por përputhja e thashethemeve shton edhe një element intrigues për iPhone-in që pritet të prezantohet në vjeshtën e 2027-s.
