Një studim i publikuar në Science Robotics prezanton një teknologji të re që mund të ndikojë fort në robotikën e butë, imazherinë mjekësore dhe sistemet autonome të shikimit. Kërkimi është udhëhequr nga Corey Zheng, kandidat për doktoraturë në inxhinieri biomjekësore në Georgia Tech, i cili u frymëzua nga mënyra se si syri i njeriut reagon ndaj dritës. Ai zhvilloi një sistem lenteje që përdor “muskuj” artificialë të aktivizuar nga drita për të kontrolluar gjatësinë fokale, pa nevojën e elektronikës apo baterive.
Kur lënda ndriçohet, muskujt artificialë kontraktohen dhe deformojnë lentën, duke bërë të mundur një rregullim shumë të saktë të fokusit. Lentet e reja, të quajtura photoresponsive hydrogel soft lens (PHySL), janë ndërtuar plotësisht nga materiale të buta dhe biokompatibile, ndaj është e përshtatshme për përdorim në robotikë dhe pajisjet mjekësore që duhet të ndërveprojnë në mënyrë të sigurt me indet njerëzore. Zemra e teknologjisë është një hidroxhel që reagon ndaj nxehtësisë, një polimer thithës uji i ngjashëm me atë të lentove të kontaktit, i pasuruar me grafen që shndërron dritën në nxehtësi, duke shkaktuar ndryshime në formë që funksionojnë si muskuj artificialë.
Në laborator, studiuesit arritën të kontrollonin gjatësinë fokale, lëvizjen e lentes dhe madje të krijonin aberacione të caktuara optike thjesht duke ndryshuar modelin e ndriçimit. Kjo u dha mundësi të kapnin imazhe me cilësi të lartë që varionin nga qelizat individuale deri te ambiente të tëra. Performanca e sistemit, si në diapazon fokal ashtu edhe në rezolucion, ishte krahasuar me atë të syrit të njeriut.
Ekipi prezantoi gjithashtu një prototip të një kamere pa elektronikë, që kombinon lentën e butë me një qark imazherik të bazuar në lëngje, i kontrolluar nga valvula të aktivizuara nga drita. Kjo qasje mund të përdoret në robotë biomimetikë më autonomë. Projekti është mbështetur nga disa institucione kërkimore federale amerikane, dhe teknologjia është tashmë e mbrojtur nga një aplikim patentimi.
