Ndërsa dimri afrohet, hyrja në një makinë të ftohtë mund të jetë një përvojë e pakëndshme, sidomos nëse automjeti ka qëndruar jashtë për disa ditë. Megjithatë, ekspertët paralajmërojnë se ngritja e menjëhershme e ngrohjes në maksimum nuk është zgjidhja më e mirë, pasi kabina mund të bëhet shpejt e nxehtë dhe e parehatshme.
Sipas Greg Carter, specialist teknik në AA, temperatura ideale në makinë është midis 19°C dhe 22°C, pasi ofron një ekuilibër të përsosur për shumicën e njerëzve. “Kjo gamë është e ngjashme me temperaturën e shtëpisë – mjaftueshëm e ngrohtë për rehati, por jo aq sa të shkaktojë përgjumje,” tha ai. Carter shton se ngrohëset e sediljeve janë një mënyrë efektive për t’u ngrohur shpejt ndërsa sistemi i brendshëm arrin temperaturën e dëshiruar.
Një studim i Genesis Motors dhe AA, me afro 14,000 shoferë, konfirmoi se 22°C është temperatura më e preferuar për udhëtime të rehatshme. Ekspertët gjithashtu ndanë disa këshilla për ngrohjen efikase të makinës: sipas Consumer Reports, është e mjaftueshme ta lini motorin ndezur vetëm një minutë përpara nisjes, pasi makina nxehet më shpejt duke e vozitur sesa duke e lënë në vend për 15 minuta.
Gjithashtu, mos ndizni ventilatorin menjëherë – prisni një ose dy minuta që ajri të nxehet, dhe më pas drejtoni qarkullimin e ajrit nga gjoksi për ngrohje më të shpejtë. Kur të ndiheni rehat, rregullojeni drejt këmbëve, pasi nxehtësia ngrihet nga poshtë.
Ekspertët paralajmërojnë të mos e ngrohni makinën në garazh të mbyllur, për shkak të rrezikut nga monoksidi i karbonit. Po ashtu, shmangni veshjen e xhupave të trashë gjatë drejtimit — heqja e tyre më vonë mund të shpërqendrojë dhe të sjellë rrezik.
