Reebok ka hyrë zyrtarisht në tregun e teknologjisë shëndetësore, duke prezantuar Reebok Smart Ring. Unaza e parë inteligjente e kompanisë vjen në partneritet global me F45 Training, një zinxhir ndërkombëtar palestrash të fokusuara te trajnimi funksional. Ky bashkëpunim synon të bashkojë komunitetin e F45 me veshjet sportive të performancës së Reebok, duke integruar teknologjinë me stërvitjen moderne.
Reebok Smart Ring, me një çmim prej $249, është krijuar për të ndihmuar përdoruesit, anëtarë dhe trajnerë të F45 apo sportistë të tjerë, të monitorojnë aktivitetin fizik, rrahjet e zemrës, gjumin, stresin dhe temperaturën e trupit. Të dhënat përpunohen në një tregues të vetëm të quajtur “One Score”, që ofron një vlerësim gjithëpërfshirës të mirëqenies dhe gatishmërisë fizike. Të gjitha informacionet sinkronizohen përmes aplikacionit Reebok Fitness, që shërben si qendër për menaxhimin e të dhënave shëndetësore.
Në kuadër të partneritetit, trajnerët e F45 do të pajisen me veshje Reebok, ndërsa është lançuar edhe një koleksion i përbashkët sportiv, i disponueshëm në faqen zyrtare të kompanisë. CEO i F45 Training, Tom Dowd, u shpreh se kjo marrëveshje “i jep mundësinë komunitetit tonë të përjetojë trajnimin në një nivel të ri përmes pajisjeve, teknologjisë dhe përvojës.”
Smart Ring i Reebok hyn në konkurrencë të drejtpërdrejtë me produkte si Oura Ring, Ultrahuman Ring dhe Samsung Galaxy Ring, që tashmë dominojnë tregun e aksesorëve inteligjentë. Me fokus në saktësinë e ndjekjes së aktivitetit fizik, Reebok synon të përmirësojë aspektet ku konkurrentët janë kritikuar më parë. Ky produkt shënon hyrjen strategjike të Reebok në industrinë e “health tech”, duke e vendosur kompaninë në një linjë të re inovacioni mes markave të njohura të mirëqenies dhe teknologjisë.
