Google po prezanton mjete të reja rikuperimi që synojnë ta bëjnë më të lehtë dhe më pak stresues procesin e rikthimit të aksesit në llogari të bllokuara. Në vend të pyetjeve të sigurisë apo adresave të rikuperimit, përdoruesit tani mund të verifikojnë identitetin e tyre përmes numrit të lidhur të celularit ose kontakteve të besuara, si miq apo familjarë.
Funksioni i ri Recovery Contacts u mundëson përdoruesve të caktojnë persona të besuar që mund të ndihmojnë në konfirmimin e identitetit në rast se llogaria komprometohet ose humbet fjalëkalimi. Edhe pse Google nuk ka sqaruar hollësitë teknike të procesit, kompania thekson se kjo ofron “një mënyrë të thjeshtë dhe të sigurt për të rikthyer aksesin kur metodat standarde dështojnë.” Opsioni tashmë është i disponueshëm për llogaritë personale të Google dhe mund të gjendet te seksioni Security në cilësimet e llogarisë.
Një tjetër risi është Sign in with Mobile Number, një funksion i ri për Android që identifikon automatikisht llogaritë Google përmes numrit të telefonit të lidhur. Ai synon përdoruesit që po përpiqen të rikuperojnë llogarinë në një pajisje të re pas humbjes së telefonit të vjetër. Në vend të fjalëkalimit të llogarisë, sistemi kërkon fjalëkalimin që ju përdornit në telefonin e mëparshëm. Google njofton se funksioni po shpërndahet gradualisht në mbarë botën.
Këto përditësime janë pjesë e fushatës më të gjerë të Google për forcimin e sigurisë digjitale. Kompania ka shtuar gjithashtu paralajmërime në Google Messages kundër links të dyshimta që mund të çojnë në faqe mashtruese, si dhe funksionin Key Verifier, që ndihmon përdoruesit të verifikojnë kontaktet dhe të shmangin mashtruesit apo imituesit online.
