Sony ka konfirmuar se konsola e saj e ardhshme, me shumë gjasa PlayStation 6, është në zhvillim dhe pritet të vijë “brenda disa viteve.” Këtë e la të kuptohet Mark Cerny, arkitekti kryesor i PS5 dhe PS5 Pro, në një video me Jack Huynh, zëvendëspresident i lartë i AMD. Dyshja folën për përparime të reja në teknologjinë grafike që po zhvillohen nga Sony dhe AMD, megjithëse këto teknologji ndodhen ende në faza shumë të hershme dhe ekzistojnë vetëm në simulime.
Fokusi kryesor është përmirësimi i mënyrës sesi GPU-të e ardhshme do të përballojnë upscaling grafik, ray tracing, dhe path tracing, teknika që krijojnë botë virtuale më realiste. Sipas Cerny-t, qasja aktuale ka arritur kufirin e saj, ndaj Sony po punon me AMD për të integruar elemente nga arkitektura e re RDNA. Huynh prezantoi Radiance Cores, njësi të dedikuara për ray tracing dhe path tracing që do të rrisin ndjeshëm performancën. Këto bërthama do të përdoren si në konsolën e ardhshme të Sony, ashtu edhe në GPU-të e reja të AMD dhe potencialisht në Xbox.
AMD po sjell gjithashtu përmirësime përmes teknologjisë së FSR Redstone dhe Neural Radiance Caching, të cilat përdorin inteligjencën artificiale për upscaling më efikas. Një tjetër risi është Universal Compression, një metodë e re kompresimi që do të zëvendësojë sistemin Delta Color Compression të PS5. Kjo do të lejojë GPU-n të ofrojë më shumë detaje dhe efikasitet më të madh energjetik.
Këto zhvillime mund të ndikojnë edhe në pajisjen portative PlayStation që përflitet prej kohësh, pasi reduktimi i ngarkesës në GPU dhe rritja e efikasitetit janë thelbësore për një formë të tillë. Për momentin, Sony duket e përqendruar në ndërtimin e një platforme më të fuqishme dhe më ekonomike në energji për brezin e ardhshëm të konsolave.
