Samsung ka nisur shpërndarjen e Android 16 me One UI 8, por tashmë janë shfaqur disa rrjedhje që zbulojnë veçoritë kryesore të versionit të ardhshëm One UI 8.5, edhe pse kompania nuk e ka konfirmuar ende. Ky përditësim pritet të debutojë me serinë Galaxy S26 dhe të sjellë një sërë risi në privatësi, dizajn dhe funksione inteligjente.
Një risi e veçantë është Private Display, që kufizon këndet e shikimit duke e bërë ekranin më pak të dukshëm për të tjerët. Teknologjia “Flex Magic Pixel” me ndihmën e inteligjencës artificiale lejon nivele të ndryshme privatësie, përfshirë opsionin “Maximum Privacy”.
Po ashtu, automatic call screening do të lejojë telefonin të filtrojë vetë thirrjet e dyshimta dhe të shfaqë transkriptimin në kohë reale, pa nevojën e ndërhyrjes së përdoruesit, ndërsa opsioni manual Bixby Text Call mbetet i disponueshëm.
Në fushën e ndarjes së dokumenteve, Quick Share me NFC do të mundësojë transferime të shpejta duke afruar pajisjet, duke përdorur Wi-Fi Direct pas një “handshake” fillestar me NFC.
Pollen tracking rikthehet në aplikacionin Weather, duke ofruar nivele të detajuara për polenin e pemëve, barit të shoqëruara me ikona me ngjyra për lehtësi.
Samsung planifikon edhe një widget AI në launcher, ku përdoruesit mund të zgjedhin mes shërbimeve si Gemini, Perplexity apo Samsung Gauss për përgjigje të shpejta me tre rreshta.
Ndërkohë, ndërfaqja merr ndryshime dizajni të frymëzuara nga iOS, me menu më kompakte, shirit kërkimi në fund, efekte gradienti dhe buton “back” lundrues.
Përdoruesit do të kenë mundësi çaktivizimi të përkohshëm të Auto Blocker, një funksion sigurie që deri tani kufizonte sideloading ose komanda USB, me rikthim automatik pas 30 minutash.
Një tjetër risi është mbrojtja ndaj rritjes së menjëhershme të ndriçimit të ekranit, smartphone-i do t’i zbulojë këto segmente të shpejta në video dhe do të ulë ndriçimin e ekranit për të ndihmuar personat me fotosensitivitet ose epilepsi.
Së fundi, Control Panel i personalizueshëm do të lejojë lëvizjen dhe heqjen e çdo moduli, duke e bërë menynë më fleksibël se kurrë. Këto veçori janë ende në fazë testimi dhe mund të ndryshojnë, por rrjedhjet tregojnë se One UI 8.5 pritet të jetë një nga përditësimet më të rëndësishme për telefonët Galaxy, me përmirësime në privatësi, aksesueshmëri dhe përdorim të përditshëm.
