Amazon po përgatitet të hyjë fuqishëm në tregun e realitetit të shtuar (AR), me zhvillimin e dy modele syzesh inteligjente, një për konsumatorët dhe një tjetër për punonjësit e shpërndarjes. Sipas një raporti të The Information, syzet për përdorim personal mbajnë emrin e koduar Jayhawk dhe do të pajisen me mikrofonë, altoparlantë, kamera dhe një ekran me ngjyra të plota të integruar në njërin sy. Ky projekt synon të rivalizojë drejtpërdrejt iniciativat e Meta Platforms, e cila tashmë është një nga lojtarët kryesorë në fushën e AR.
Paralelisht, Amazon po zhvillon edhe një version profesional të quajtur Amelia, i dedikuar për shoferët e shpërndarjes. Ky model do të ofrojë udhëzime në ekran për renditjen dhe dorëzimin e pakove, duke synuar të rrisë efikasitetin e procesit logjistik. Sipas burimeve, syzet për punonjësit pritet të debutojnë më shpejt, ndoshta që në tremujorin e dytë të vitit 2026, me një prodhim fillestar prej rreth 100,000 njësish.
Ndërsa modelit të konsumatorëve i është parashikuar një lançim më të vonshëm, në fund të 2026-s ose fillim të 2027-s, dizajni i tij do të jetë më i hollë dhe më estetik krahasuar me versionin e punës. Çmimi i shitjes ende nuk është bërë publik.
Raporti thekson gjithashtu se Amazon po përdor teknologjinë e ekraneve AR nga një kompani kineze e quajtur Meta-Bounds, e njëjta që do të fuqizojë të dyja modelet. Versioni për konsumatorët do të ketë ekran me ngjyra të plota, ndërsa ai për punonjësit do të jetë më funksional dhe praktik.
Ky hap tregon qartë ambicien e Amazon për të diversifikuar portofolin e tij teknologjik dhe për të konkurruar në një treg ku realiteti i shtuar shihet si faza e ardhshme e ndërveprimit dixhital. Nëse planet për syzet AR realizohen, kompania jo vetëm do të rivalizojë Meta-n, por edhe do të fuqizojë zinxhirin e saj logjistik me mjete më inovative.
