Samsung ka rifreskuar linjën e saj të tabletëve premium me prezantimin e Galaxy Tab S11 dhe Tab S11 Ultra, pasues të serisë S10. Ndryshimi më i dukshëm është eliminimi i versionit Plus, ndërsa rikthehet modeli standard Tab S11 me ekran 10.9 inç AMOLED (2560×1600). Ndërkohë, Tab S11 Ultra ruan ekranin gjigant 14.6 inç AMOLED (2960×1848), por këtë herë ka vetëm një kamerë të përparme 12MP ultraëide, duke reduktuar hapësirën e zënë nga notch-i. Të dy modelet ofrojnë rifreskim 120Hz dhe ndriçim maksimal prej 1,600 nits, ndërsa Ultra ka veshje anti-reflektive.
Nga aspekti fizik, Ultra është bërë më i hollë (5.1 mm) dhe më i lehtë (692 g), duke ofruar një bateri edhe më të madhe prej 11,600 mAh me karikim të shpejtë 45W. Tab S11 peshon vetëm 469 g, me trashësi 5.6 mm dhe bateri 8,400 mAh. Të dy tabletët vijnë me certifikim IP68.
Në performancë, të dy përdorin procesorin e ri MediaTek Dimensity 9400+ në teknologjinë 3nm, duke sjellë rritje prej 24% në CPU, 27% në GPU dhe 33% në NPU. Opsionet e memories për Tab S11 Ultra mbeten 12GB/256GB ose 512GB dhe 16GB/1TB, ndërsa Tab S11 ofrohet nga 128GB deri në 512GB me 12GB RAM. Të dy mbështesin zgjerim deri në 2TB me microSD.
Në anën softuerike, tabletët sjellin One UI 8 me Android 16 dhe funksione të zgjeruara Galaxy AI, përfshirë një mbivendosje të re “floating” që punon me split-screen. Samsung DeX përmirësohet me 4 hapësira pune dhe mbështetje multi-screen, por nuk funksionon më pa monitor të jashtëm.
Aksesorët
S Pen tashmë ka formë gjashtëkëndore, por pa Bluetooth, duke eleminuar Air Gestures. Tastiera është bërë më e hollë, ndërsa një version “Pro” pritet në 2026. Për sa i përket ndërlidhjes, nuk ofrohet më opsion që funksionon me kartë SIM; vetëm Wi-Fi, ku Ultra përfiton nga Wi-Fi 7.
