Google ka prezantuar zyrtarisht Pixel 10, 10 Pro dhe 10 Pro XL, me ndryshime kryesore që përmblidhen në dy risitë më të rëndësishme: çipi Tensor G5 dhe mbështetja për karikimin wireless Qi2. Nga jashtë, telefonat duken pothuajse identikë me gjeneratën e mëparshme, por brenda kanë përmirësime të ndjeshme. Çmimet mbeten të njëjta: Pixel 10 fillon nga $799, 10 Pro nga $999 dhe 10 Pro XL nga $1,199 për versionin 256GB, pasi varianti më i lirë 128GB është hequr.
Çipi Tensor G5, i prodhuar për herë të parë nga TSMC (jo më nga Samsung), premton një CPU 34% më të shpejtë dhe rritje 60% të performancës për proceset AI në pajisje. Po ashtu, mbështetja për Qi2 wireless charging sjell karikim magnetik në stilin MagSafe, të cilin Google e quan Pixelsnap. Pro XL arrin shpejtësi 25Ë me Qi2.2, ndërsa Pixel 10 dhe 10 Pro mbeten në 15W.
Në anën e kamerave, Pixel 10 humbet sensorin e madh 50MP dhe përdor një sensor 48MP nga Pixel 9A, si dhe një ultrawide 13MP, ndërsa modelet Pro mbajnë sensorë më të mëdhenj dhe një ultrawide 48MP. Për herë të parë, edhe versioni bazë merr telefoto 5x, megjithëse më i dobët se tek Pro-t. Pro dhe Pro XL gjithashtu përfitojnë nga AI në kamera, ku modelet e difuzionit gjenerativ rrisin cilësinë e fotove në zoom mbi 30x, duke shënuar një hap të madh, por edhe debatues për natyrën e “fotografisë së vërtetë”.
Ndryshime të tjera përfshijnë ekran më të ndritshëm, bateri pak më të mëdha (4970 mAh për Pixel 10, 4870 mAh për Pro dhe 5200 mAh për Pro XL) dhe kalimin në eSIM-only për tregun amerikan, me mbështetje për dy eSIM aktive dhe ruajtje të disa profileve.
AI është thelbi i përvojës së re. Funksioni Magic Cue sugjeron tekste dhe informacione në bazë të kontekstit, si adresë nga email për një mesazh ose detaje fluturimi gjatë thirrjes së një linje ajrore. Të gjitha këto kryhen on-device dhe nuk ruhen përtej aktiviteteve të afërta. Veç kësaj, Google sjell AI Camera Coach, Magic Editor me prompt tekstual, një aplikacion ditari që përdor AI për përmbledhje me emoji dhe një AI translator që imiton zërin e personit tjetër gjatë përkthimit.
Pixel 10, 10 Pro dhe 10 Pro XL mund të porositen që sot dhe do të vijnë në treg më 28 gusht.
