Një incident i ndodhur këtë javë në një fluturim të KLM Royal Dutch Airlines nga São Paulo drejt Amsterdamit ka rritur sërish shqetësimet mbi sigurinë e power bank në avion. Sipas videos së publikuar, tymi filloi të mbushte kabinën pasi një karikues portativ u përfshi nga flakët gjatë fluturimit. Stjuardesat përdorën shpejt shuarësin e zjarrit dhe zbatuan procedurat e sigurisë. Avioni u ul normalisht në Amsterdam dhe nuk pati të lënduar.
Power bank përmbajnë bateri litium-jon, të njëjtat që përdoren në telefona, laptopë dhe pajisje të tjera portative. Ato lejohen në avion, por vetëm në bagazhin e dorës, pasi mbajtja në bagazhin e kontrolluar paraqet rrezik të lartë nga mbinxehja. Incidente të tilla janë shtuar, me raportime të ngjashme, si fluturimi i Delta Airlines muajin e kaluar që bëri ulje emergjente në Florida për shkak të një baterie që mori flakë.
Të dhënat e Federal Aviation Administration (FAA) tregojnë se nga viti 2015 deri në fund të vitit 2024, rastet e zjarreve nga bateritë litium në fluturime amerikane janë rritur me 388%, duke ndodhur pothuajse dy herë në javë. Një anketë me mbi 800 stjuardesa e realizuar nga UL Standards & Engagement zbuloi se 87% e tyre janë të shqetësuara për këtë rrezik, ndërsa 25% e pasagjerëve pranojnë se kanë vendosur bateri litium në bagazhet e kontrolluara.
Prandaj, disa linja ajrore po marrin masa të reja. Emirates ka njoftuar se nga 1 tetori 2025 do të ndalojë përdorimin e çdo power bank gjatë fluturimeve, ndonëse pasagjerët mund t’i mbajnë ato me vete. Kjo vjen pas një rishikimi të plotë të sigurisë që evidentoi rritjen e incidenteve të lidhura me bateritë litium në industri.
