Forcat Ajrore të Shteteve të Bashkuara planifikojnë të blejnë dy Tesla Cybertruck për t’i përdorur si objektiva të cilat do të qëllohen nga raketat ushtarake. Sipas raportimit të The War Zone, testet do të zhvillohen në White Sands Missile Range (WSMR) në Nju Meksiko, një bazë ushtarake e Ushtrisë që përdoret edhe nga Forcat Ajrore.
Ndryshe nga praktika e zakonshme, ku merren automjete të ndryshme pa u kushtuar rëndësi markës, kjo zgjedhje specifike lidhet me pritshmëritë për llojet e automjeteve që mund të përdorin kundërshtarët e ardhshëm. Në dokumentin e justifikimit të blerjes, Forcat Ajrore shkruajnë se është e mundur që automjetet e armikut të përfshijnë Tesla Cybertruck, pasi këto janë treguar më rezistente ndaj dëmeve të mëdha se sa pritej. Për këtë arsye, trajnimi duhet të imitojë sa më afër situatat reale të fushës së betejës.
Automjetet nuk kanë nevojë të jenë funksionale, por trupi, xhamat dhe pasqyrat duhet të jenë të paprekura ose me dëmtime minimale. Zyrtarët nuk presin t’i blejnë direkt nga Tesla. Kjo edhe për shkak se interesi i tregut për Cybertruck ka rënë ndjeshëm — Tesla shiti vetëm 4,300 njësi në tremujorin e dytë të vitit, një rënie prej 51% krahasuar me periudhat e mëparshme, ndërsa vitin e kaluar u shitën 39,000 njësi, një shifër që nuk pritet të arrihet këtë vit.
Përveç dy Cybertruck, Forcat Ajrore po kërkojnë edhe 31 automjete të tjera, përfshirë sedanë, kamionë të vegjël “bongo”, pickup dhe SUV, të gjitha të destinuara për t’u përdorur si objektiva në testime me armë. Ky plan synon të përgatisë trupat për skenarë sa më realistë gjatë operacioneve ushtarake.
