Pas viteve të tëra pritjeje dhe shumë rrjedhjesh informacioni, Battlefield 6 më në fund është gati për prezantimin zyrtar të lojës. EA ka konfirmuar se ky event do të ofrojë pamjet e para të detajuara mbi veçoritë e lojës, hartat dhe modalitetet e ndryshme— si ato të rikthyera ashtu edhe ato krejtësisht të reja. Duke e përshkruar si “titullin më ambicioz në historinë e serisë”, EA premton një prezantim shpërthyes që do të theksojë fushëbeteja gjigante, përvojë tërheqëse loje dhe risi që ekipi i zhvillimit ka punuar prej kohësh.
Pas prezantimit kryesor, disa krijues të njohur për lojërat “first-person shooter” do të transmetojnë për herë të parë sesione gameplay nga Battlefield 6. Kjo do t’u japë fansave mundësinë ta shohin lojën në veprim nga perspektiva të ndryshme dhe të dëgjojnë përshtypjet e para nga figura të besueshme të botës së lojërave.
Eventi i prezantimit do të transmetohet më 31 korrik, në orën 20:30 (me orën e Shqipërisë/CEST). Edhe pse EA nuk ka bërë të ditur kohëzgjatjen e saktë, pritet të jetë dukshëm më i gjatë se traileri 2-minutësh që u publikua javën e kaluar. Duke marrë parasysh përmasat e lojës dhe pritshmëritë e larta, fansat mund të presin një prezantim të plotë dhe jo thjesht një trailer të shkurtër.
Transmetimi do të jetë i disponueshëm në kanalet zyrtare të Battlefield në YouTube (video lart) dhe Twitch, duke e bërë të lehtë ndjekjen nga fansat anembanë botës. Ky prezantim përbën një moment kyç për serinë kryesore të EA, e cila synon të riafirmojë Battlefield si një nga liderët në tregun konkurrues të lojërave FPS multiplayer.
