Të mërkurën vonë në mbrëmje, rreth orës 23:00 me orën lokale në Teksas, një shpërthim i madh ndodhi në qendrën e testimeve të SpaceX në Massey, ndërsa kompania po përgatitej për një test statik të raketës Starship (Ship 36), përpara fluturimit të saj të 10-të. SpaceX konfirmoi se të gjithë punonjësit ishin të sigurt dhe se ishte mbajtur një zonë e sigurisë përreth vendit të testimit.
Sipas deklaratës së kompanisë, pas një testi të suksesshëm me një motor më herët gjatë javës, gjatë ngarkimit të raketës me lëndë djegëse kriogjenike për një test me 6 motorë, ndodhi një “ngjarje energjike e papritur” që shkaktoi shkatërrimin e plotë të raketës Starship dhe dëmtime në zonën përreth platformës së testimit. Shpërthimi ndezi disa zjarre në vendin e ngjarjes, i cili do të vlerësohet pasi të jetë i sigurt për t’u vizituar.
Analiza fillestare e SpaceX tregon se shkaku i mundshëm ishte një dështim i një dhome të presuar me gaz azoti (COPV) në pjesën e përparme të raketës. Në rrjetin X, SpaceX e quajti shpërthimin një “anomali madhore”.
Pavarësisht intensitetit të shpërthimit, nuk janë raportuar të lënduar, as nga SpaceX dhe as nga autoritetet lokale.
Ky test ishte pjesë e përgatitjeve për fluturimet me dizajnin e përmirësuar “V2” të Starship, i cili sipas Elon Musk, ka më shumë kapacitet karburanti, peshë të ulët dhe besueshmëri më të lartë. SpaceX gjithashtu po punon në dizajnin “V3”, që synon të realizojë një fluturim çdo javë brenda një viti.
