Meta po përgatitet të hapë një laborator të ri kërkimi për inteligjencën artificiale, me fokus te zhvillimi i “superinteligjencës” — një formë e avancuar e AI që tejkalon kapacitetet e trurit njerëzor. Kjo iniciativë vjen si pjesë e përpjekjeve të kompanisë për të mbetur konkurruese në garën globale për dominimin e teknologjisë AI.
Për të udhëhequr laboratorin, Meta ka rekrutuar Alexandr Wang, themelues i Scale AI, një kompani që ndihmon në ndërtimin e sistemeve të inteligjencës artificiale duke etiketuar dhe strukturuar të dhëna në shkallë të gjerë. Meta po negocion gjithashtu një investim prej miliarda dollarësh në Scale AI, që përfshin edhe transferimin e stafit të saj në Meta. Kompania po ofron pagesa 7 deri në 9-shifrore për të joshur studiues nga OpenAI, Google dhe kompani të tjera të mëdha.
Ky laborator i ri është pjesë e një ristrukturimi të brendshëm të përpjekjeve të Meta-s në fushën e AI, të shoqëruara me sfida si largimi i punonjësve dhe produktet që nuk përmbushën pritshmëritë. Meta ka investuar miliarda dollarë në integrimin e AI në produktet e saj, përfshirë syzet inteligjente dhe aplikacionin Meta AI, i përdorur nga më shumë se një miliard njerëz në muaj.
Që nga viti 2013, kërkimet në A.I. janë udhëhequr nga Yann LeCun, një pionier i rrjeteve nervore dhe fitues i çmimit Turing. Ai përkrah një qasje më afatgjatë për arritjen e inteligjencës së përgjithshme artificiale (AGI), duke argumentuar se kërkohen ide tërësisht të reja për të arritur këtë qëllim.
Në përpjekje për transparencë dhe ndikim, Meta ka hapur kodin e saj burimor, përfshirë modelin Llama dhe chatbot-in Meta AI. Megjithatë, kompania është përballur me kritika për manipulim të rezultateve në testime. Me praninë e Alexandr Wang, Meta shpreson të rifitojë terrenin e humbur në garën globale të AI.
