Në Hungari, rrethi Újpest i Budapestit ka prezantuar një qen robotik për të edukuar fëmijët mbi kujdesin dhe përgjegjësinë ndaj kafshëve. Roboti u shfaq gjatë eventit vjetor “Dita e Fëmijëve të Kohëve të Vjetra” dhe u zhvillua në bashkëpunim me Ligën e Shpëtimit të Kafshëve. Qeni robot ndërvepron me fëmijët përmes aktiviteteve që nxisin ndjeshmërinë, përgjegjësinë dhe dashurinë për kafshët. Kjo gjë u bë e ditur përmes një postimi në faqjen zyrtare të rrjeteve sociale.
Roboti është modeli Go2 nga kompania kineze Unitree, i pajisur me teknologji të avancuar si 4D LiDAR dhe një sistem vizioni hemisferik. Me një dizajn të lehtë, por të qëndrueshëm, ai mund të ndjekë njerëzit, të shmangë pengesat dhe të kuptojë komanda njerëzore nëpërmjet modelit gjuhësor të OpenAI, GPT. Këto aftësi e bëjnë të përshtatshëm për edukim dhe potencialisht për misione shpëtimi në terrene të vështira.
Përveç eventeve publike, qeni robot do të jetë pjesë e përhershme në çerdhe dhe qendra komunitare në Újpest, ku do të ndihmojë në edukimin e fëmijëve që në moshë të hershme për mbrojtjen e kafshëve. Iniciativa përfshiu edhe një ceremoni për zgjedhjen e emrit të robotit, duke përfshirë komunitetin në mënyrë aktive dhe duke forcuar lidhjen mes njerëzve dhe projektit.
Zyrtarët e konsiderojnë robotin si një simbol të inovacionit dhe një mjet praktik që mund të ndihmojë në operacionet e shpëtimit. Kjo qasje tregon se teknologjia mund të përdoret për të kultivuar ndjeshmëri dhe përgjegjësi sociale që në fëmijëri.
Ndërkohë, në SHBA, studentët e Universitetit St. John’s kanë prezantuar “Thunder Paws”, një tjetër model Go2, për të argëtuar audiencën në një event sportiv.
