Një sondazh i ri ka zbuluar se pothuajse gjysma e të rinjve të moshës 16 deri në 21 vjeç do të preferonin të jetonin në një botë pa internet.
Studimi, i realizuar nga British Standards Institution me 1,293 pjesëmarrës, tregoi se 70% e personave ndihen më keq me veten pas përdorimit të rrjeteve sociale. Rreth 50% e pjesëmarrësve mbështesnin një “orë policore digjitale” pas orës 22:00, dhe 46% preferojnë të jetojnë në një botë pa internet.
Një përqindje e konsiderueshme—25%—kalojnë mbi katër orë në ditë në rrjete sociale, dhe 42% pranuan se i kanë gënjyer prindërit për aktivitetet e tyre online. Gjithashtu, 42% e personave në këtë studim kanë gënjyer për moshën, 40% kanë llogari të fshehta, dhe 27% janë shtirur si dikush tjetër.
Këto shqetësime kanë nxitur interes politik, me Sekretarin e Teknologjisë në Mbretërinë e Bashkuar, Peter Kyle, që po shqyrton vendosjen e ndalimeve të detyrueshme për aplikacione si TikTok dhe Instagram. Megjithatë, Rani Govender nga NSPCC thekson se oraret e kufizuara nuk mjaftojnë pa masa shtesë. Ajo kërkon platforma më të sigurta dhe që krijojnë më pak varësi tek përdoruesit.
Sondazhi zbuloi gjithashtu se 27% e pjesëmarrësve kanë ndarë vendndodhjen e tyre me të huaj. Pas pandemisë, tre të katërtat kanë kaluar më shumë kohë online, dhe 68% mendojnë se kjo ka ndikuar negativisht në shëndetin e tyre mendor.
Andy Burroës, drejtues i fondacionit Molly Rose, tha se të rinjtë janë të vetëdijshëm për rreziqet dhe kërkojnë mbrojtje nga kompanitë teknologjike. Ai theksoi nevojën urgjente për ligje që garantojnë sigurinë e fëmijëve para interesave të korporatave.
