Me mbi 80,000 raste të konfirmuara dhe rreth 2,800 të vdekur, COVID-19 duket se së shpejti do të kthehet në pandemi botërore, ende të pa zyrtarizuar nga OBSH.
Këto ditë një antiviral eksperimental i quajtur remdesivir, krijuar në laboratorët amerikanë, po testohet në Kine dhe rezultatet e para duket se janë premutese.
“Ka vetëm një ilaç për momentin i cili ne mendojmë se ka efektivitet të vërtetë, ai quhet remdesivir,” tha Bruce Aylward, asistent drejtor në Organizatën Botërore të Shëndetit, gjatë një konference për shtyp këtë javë.
Në laborator, remdesivir ndalon përhapjen e coronavirus në qeliza. Ky ilaç është testuar pozitiv gjithashtu edhe kundër MERS dhe SARS. Pacientët e parë që po marrin këtë ilaç janë nën kujdesjen e mjekëve dhe në disa prej tyre gjendja duket e përmirësuar.
Së shpejti mendohet që të ngrihen disa qendra testimi në të gjithë botën me qellimin e marrjes së 400 pacientëve në testim. Andre Kalil, përgjegjës për projektin, shprehet gjithashtu se:
Rreth 80% e personave kanë një gjendje mesatare dhe shumica e tyre do e kalojnë vetë këtë sëmundje. Për momentin qëllimi ynë është të ndihmojmë ato në nevojë. Brenda pak javësh, qendrat do të hapen në të gjithë botën
Në një situatë kaq alarmante, ku krijimi i një vaksine do të merrte të paktën një vit deri në 18 muaj kohë, OBSH i ka dhënë dritën jeshile kurimeve eksperimentale të cilat po vijnë nga çdo cep i botës me shpresën që së shpejti coronavirus t’i përkasë së shkuarës.
