Apple dëshiron të zgjerojë më tepër mbështetjen për krijimin e një shtëpie inteligjente, dhe po punon për të krijuar një kamera inteligjente sigurie e cila do të dalë në treg pas dy vitesh.
Analisti i zinxhirit të furnizimit Ming-Chi Kuo raporton se kompania po planifikon të fillojë prodhimin e një kamere inteligjente në vitin 2026 dhe synon të shesë mbi 10 milionë njësi në vit.
Kuo gjithashtu raporton se kamera është “projektuar për t’u integruar pa probleme me produktet e tjera harduerike të Apple përmes lidhjes me valë” dhe spekulon se do të integrohet thellë me Apple Intelligence dhe asistentin zanor Siri të Apple.
Konkurrentët e Apple, Amazon dhe Google, të dy kanë ofrojnë prej kohësh kamera për platformat e tyre përkatëse të shtëpive inteligjente dhe tashmë kanë filluar të integrojnë AI në to. Me AI gjeneruese, kamerat inteligjente të shtëpisë kanë potencialin të shkojnë përtej vetëm një pajisje sigurie dhe të ofrojnë më tepër informacione për shtëpinë tuaj inteligjente, për shembull, duke ditur se kush është në shtëpi dhe kur.
Ndërmarrja e kësaj iniciative nga Apple bën shumë sens, pasi kamerat e sigurisë janë ndër llojet e pajisjeve që po përdoren gjithnjë e më tepër në shtëpi. Gjithashu me këtë lëvizje Apple i tërheq akoma më tepër klientët në ekosistemin e saj.
Për më tepër, së bashku me të ardhurat nga hardueri premium, kamerat ofrojnë të ardhura potenciale të vazhdueshme nga abonimet. Shërbimi HomeKit Secure Video i Apple (HKSV), i cili përfshihet në planin iCloud të Apple, ruan pamjet e regjistruara nga kamerat në mënyrë të sigurt në llogarinë iCloud – numri i kamerave të mbuluara varet nga abonimi juaj, duke shkuar deri në 11 dollarë në muaj.
Shërbimi kërkon gjithashtu një Apple Home Hub, si një HomePod ose AppleTV, i cili mund të analizojë pamjet dhe t’ju dërgojë sinjalizime specifike për njerëzit, kafshët, automjetet dhe paketat.
