Po sikur të mund të shikonim brenda trupit të njeriut pa pasur nevojë t’i drejtohemi endoskopisë, një procedurë që kërkon anestezi dhe teknikë të kujdesshme për të minimizuar komplikimet? Falë një startup të quajtur Pillbot, së shpejti mund të kemi një alternativë të teknologjisë së lartë.
Bashkëthemeluesi dhe inxhinieri Alex Luebke tregoi shpikjen më të fundit të kompanisë, një pilulë të vogël që gëlltitet dhe u jep mjekëve një pamje të drejtpërdrejtë të brendësisë së trupit të njeriut.
Luebke ishte mjaft i sigurt në shpikjen e startup-it të tij, saqë ai gëlltiti një nga këto pilula drejtpërdrejt në skenë, duke bërë një demonstrim unik të një teknologjie që mund të ndryshojë lojën. Kjo pilulë më pas u kontrollua nga distanca me një kontrollues PlayStation 5 nga profesori i mjekësisë së Mayo Clinic dhe bashkëthemeluesi i Pillbot, Vivek Kumbhari, duke i dhënë audiencës një pamje magjepsëse të drejtpërdrejtë të pjesës së brendshme të ezofagut dhe stomakut të Luebke.
“Gjatë 150 viteve të fundit apo më shumë, ne kemi pasur teknologji të shkëlqyera që na lejojnë të shikojmë nga jashtë, si rrezet X dhe MRI. Por ajo që unë propozoj dhe çfarë do të doja që ne të eksploronim sot është të shikojmë mikro- robotika brenda trupit të njeriut” tha Luekbe në eventin e prezantimit të transmetuar në YouTube.
Në një demonstrim të shkurtër, përpara se Luebke të gëlltiste pilulën, Kumbhari tregoi aftësinë e pajisjes së vogël për të notuar në një rezervuar të vogël uji falë tre pompave që mund të shyjnë ujë në gjashtë drejtime të ndryshme.
“Pra, tani që kemi mbaruar këtu, PillBot do të marrë kursin e tij natyral përmes dhe jashtë trupit,” tha Kumbhari. “Dhe për fat të mirë për Alex, ai nuk do të jetë i vetëdijshëm për këtë dhe nuk do të duhet ta rimarrë këtë kapsulë kur të dalë jashtë.“
“Ishte e shijshme,” u përgjigj më vonë Luebke. “Dhe jo, ju nuk ndjeni asgjë kur roboti lëviz brenda jush.”
