Shtetet e Bashkuara kanë paralajmëruar më herët aleatët e saj se Rusia mund të lëshojë një armë bërthamore në hapësirë gjatë këtij viti, siç bëhet e ditur nga një raportim në Bloomberg.
Rusia thuhet se po zhvillon këtë armë bërthamore për të nxjerrë jashtë loje satelitët qështete të ndryshme kanë dërguar në hapësirë. Sigurisht ky veprim do të shkelte Traktatin e Hapësirës së Jashtme të nënshkruar dhe nga Rusia në vitin 1967. Ky zbulim vjen pas paralajmërimeve në fillim të këtij muaji nga kryetari i House Intelligence Committee për një kërcënim serioz, por të paqartë mbi nivelin e rrezikut të paraqitur nga Rusia.
Më vonë presidenti Biden konfirmoi se Rusia ka krijuar një armë hapësinore anti-satelitore që nuk rrezikon drejtpërdrejt jetët e njerëzve. Shtëpia e Bardhë nuk pranoi të komentojë. Presidenti rus Vladimir Putin deklaroi të martën se “ne gjithmonë kemi qenë dhe mbetemi kundër vendosjes së armëve bërthamore në hapësirë. Në hapësirë, ne po bëjmë vetëm atë që kanë bërë vendet e tjera, përfshirë SHBA-në.”
Ekspertët dhe zyrtarët amerikanë thonë se kjo tregon përshkallëzimin e tensioneve midis SHBA-së, Rusisë dhe Kinës në armatimin e orbitës së Tokës. Vlerësimet aktuale tregojnë se Rusia nuk ka ndërmend të shpërthejë ndonjë armatim orbital. Megjithatë, rreziqet e shpërthimit aksidental mbeten, të cilat potencialisht mund të ndikojnë në një të tretën e satelitëve dhe të prishin rëndë rrjetet e komunikimit në nivel global.
Që nga prilli i vitit 2022, kishte rreth 7,800 satelitë operacionalë në orbitë. SHBA dhe aleatët po përpiqen të pengojnë planet e vendosjes së Rusisë nëpërmjet angazhimit diplomatik me Kinën dhe Indinë.
