Një pajisje e re e prezantuar në CES 2024 që monitoron valët e trurit tuaj ndërsa drejtoni një automjet ka si qëllim të parandalojë aksidentet e shkaktuara nga lodhja ose mungesa e përqendrimit, dhe kjo pajisje u testua nga DailyMail.
Ky produkt është zhvilluar nga kompania japoneze Macnica dhe përdor një seri elektrodash dhe sensorësh që monitorojnë aktivitetin në rajonet e rëndësishme të trurit tuaj. “Duke matur aktivitetin tuaj të trurit, ne mund të kuptojmë milisekondë pas milisekondë gjendjen tuaj, që nga sa i përgjumur është një drejtues e deri në një shkallë të saktë të përqëndrimit”, tha Leon Deouell, shefi i shkencës në Inner Eye.
Duke lexuar valët e trurit tuaj dhe duke i analizuar ato me AI, Macnica arrin të kuptojë se sa mirë jeni të përqendruar, nëse jeni të hutuar dhe sa të përgjumur jeni. Për momentin, është thjesht për qëllime kërkimore dhe nuk është finalizuar në një produkt që klientët mund ta përdorin në përditshmërinë e tyre.
Një nga qëllimet kryesore të kësaj teknologjie është të ndihmojë inxhinierët në projektimin e automjeteve të së ardhmes. Duke përdorur të dhëna për vëmendjen e shoferit, ata do të jenë në gjendje të shohin rezultatet e përpjekjeve të tyre inxhinierike të cilat më pas do të përdoren për të përmirësuar sistemet aktuale teknologjike dhe për t’i nxitur shoferët që të ruajnë vëmendjen.
Nëse vëren se jeni të shpërqendruar ose të përgjumur, produkti do të aktivizonte njoftimet në bord për t’ju paralajmëruar që të bëni një pushim. Ata gjithashtu do të jenë në gjendje t’i bëjnë automjetet autonome më të sigurta dhe më të këndshme për t’u drejtuar, tha Deouell.
Kompania Inner Eye e zhvilloi softuerin e leximit të valëve të trurit dhe u bashkua me Macnica për të aplikuar teknologjinë në makina. Nëse jeni vigjilent, tha Deouell, një automjet autonom mund të marrë parasysh gjendjen tuaj aktive dhe të vetëdrejtohet pak më shpejt. Por nëse nuk jeni të përqëndruar, makina do të ngadalësohet për ta bërë udhëtimin më të sigurt.
