Nintendo dhe Sony Pictures do të krijojnë një film aksion bazuar në historinë e serisë së dashur të video-lojërave The Legend of Zelda. Dizenjuesi i njohur i lojërave Shigeru Miyamoto dhe Avi Arad i trilogjisë Spider-Man do të jenë producentë, me regjinë e Wes Ball të The Maze Runner.
Nuk ka ende asnjë raportim se kush do të jetë pjesë e kastit, apo dhe vetë historia e filmit. Në një postim në llogarinë japoneze të Nintendo në X, Miyamoto zbuloi se ai ka qenë duke punuar në film me Arad për disa kohë. Ai tha se zhvillimi i filmit ka filluar, me Nintendo të përfshirë shumë në prodhim. “Do të duhet kohë deri në përfundimin e tij, por shpresoj ta prisni me padurim”, u ka shkruar ai fansave.
Legend of Zelda është ekskluziviteti i dytë më i suksesshëm i Nintendo pas Super Mario, pasi ka shitur rreth 150 milionë kopje që nga debutimi i tij në 1986. Versioni i tij i fundit, The Legend of Zelda: Tears of the Kingdom, shiti 10 milionë kopje në tre ditë kur u publikua majin e kaluar, duke e bërë atë lojën Zelda më të shitur të të gjitha kohërave.
Filmi i ardhshëm vjen në një periudhë “rilindjeje” për filmat e bazuar në video-lojra, të cilët dikur mendohej se ishin pothuajse të garantuara që do të dështonin. Në vitet ’90, adaptimet filmike të lojërave video të njohura si Super Mario Bros dhe Mortal Kombat ishin dështime kritike dhe komerciale kur u publikuan. Por filmi Super Mario Bros i Nintendo-s i mbushur me yje, i cili u publikua në fillim të këtij viti, u bë një nga filmat e animuar me fitimet më të larta të të gjitha kohërave, duke fituar më shumë se $1 miliard.
