Pas disa javësh plot spekulime, X ka konfirmuar planet për të tarifuar përdoruesit e rinj për përdorimin e shërbimeve të platformës. Kompania ndau detaje në lidhje me një abonim të ri të quajtur “Not a Bot“, që po teston aktualisht në Zelandën e Re dhe Filipine.
Abonimi kërkon që përdoruesit e rinj të paguajnë $1 në vit në mënyrë që të postojnë. “Që nga 17 tetori 2023 ne kemi filluar të testojmë “Not A Bot”, një metodë e re abonimi për përdoruesit e rinj në dy vende,” shpjegon X. “Ky test i ri u zhvillua për të forcuar përpjekjet tona tashmë të rëndësishme për të reduktuar manipulimin e platformës sonë dhe aktivitetin e robotëve. Kjo do të jetë një masë potencialisht e fuqishme për të na ndihmuar të luftojmë bots dhe spammers në X, duke balancuar aksesin e platformës me shumën e vogël të tarifës.”
Sipas skemës, përdoruesve të rinj do t’u kërkohet të verifikojnë numrat e tyre të telefonit dhe të paguajnë tarifën prej $1 nëse duan të përdorin shërbimet kryesore si tweet-et, retweet-et, bookmark dhe likes. Ata që nuk paguajnë do të mund të përdorin X vetëm në modalitetin “read only“. Kompania tha se për momentin tarifat nuk do të zbatohen për përdoruesit ekzistues. “Këtë gjë nuk po e bëjmë për përfitime,” tha X.
Megjithatë, testi fillestar do të nxisë spekulimet se X ka në plan të tarifojë një ditë të gjithë përdoruesit. Gjatë një bisede të transmetuar drejtpërdrejt me kryeministrin izraelit Benjamin Netanyahu muajin e kaluar, Elon Musk sugjeroi se ai po konsideronte një lloj pagese të detyrueshme si pjesë e një përpjekjeje për të luftuar robotët dhe spam.
“Opsionet e abonimit janë provuar të jenë zgjidhja kryesore që funksionon në shkallë të gjërë,” tha X në një postim nga llogaria e suportit.
