Pixel Watch 2 vjen me sensorë të rinj për të regjistruar më mirë të dhënat tuaja shëndetësore

Pixel Watch 2 me vlerë $349,99 mund të mos duket shumë i ndryshëm nga jashtë, pasi ndryshimet kryesore janë përfshirë në brendësi të saj.

Ora inteligjente e gjeneratës së dytë përmban një sërë përmirësimesh, duke përfshirë një procesor të ri, një grup sensorësh të rinj, veçori të shtuara sigurie, Wear OS 4, dhe 24 orë jetëgjatësi baterie — këtë herë me always-on display.

Me një shikim vërejmë se ndryshimi kryesor është se ekrani qëndron në të njëjtin nivel me kurorën dixhitale, ku origjinali kishte një të dalë të lehtë. Një tjetër ndryshim i padukshëm për syrin e lirë: trupi tani përbëhet nga alumini 100% i ricikluar në vend të çelikut inox. Në këtë mënyrë ora inteligjente është bërë më e lehtë: Pixel Watch peshonte 36 gram, ndërsa Pixel Watch 2 është 31 g.

Për sa i përket sensorëve, në vend të një linje të vetme me LED, tani ka shumë LED dhe fotodioda për të marrë informacione nga disa kënde dhe pozicione. Të dhënat futen në një algoritëm që CEO i Fitbit James Park thotë se është 40% më i saktë për aktivitete të rënda.

Këtë vit, Google shtoi gjithashtu një sensor të temperaturës së lëkurës dhe aktivitetit elektrodermal të vazhdueshëm (EDA). Të dyja ndihmojnë në aktivizimin e gjurmimit të stresit, të cilin Fitbit e prezantoi me Sense 2. Sensori EDA zbulon sasi të vogla djerse, e cila mund të ndihmojë në përcaktimin e stresit trupor kur kombinohet me të dhënat si ndryshueshmëria e rrahjeve të zemrës dhe temperatura e lëkurës. Ashtu si me Sense 2, ju duhet të merrni një njoftim paksa të vonuar kur zbulohet një ngjarje stresuese. Më pas ju inkurajoheni të regjistroni se si ju bëri të ndiheni ajo ngjarje.

Jetëgjatësia e baterisë ishte një pikë e madhe e dobët për Pixel Watch. Këtë herë, Park thotë se ekipi ka punuar shumë për t’u siguruar që bateria 306 mAh e Pixel Watch 2 mund të punojë 24 orë me always-on display. Përdoruesit duhet gjithashtu të jenë në gjendje të karikojnë orën në 50% në 30 minuta dhe 100% në 75 minuta. Kjo gjë mundësohet nga Wear OS 4 – për të cilin Google thotë se duhet të zgjasë jetëgjatësinë e baterisë – dhe procesori i ri, më efikas Qualcomm Snapdragon W5.

Ora e gjeneratës së dytë do të jetë në gjendje të regjistrojë automatikisht fillimet dhe ndalesat e stërvitjes për shtatë aktivitete, duke përfshirë vrapimin dhe çiklizmin në natyrë. Shërbime të reja që do të vijnë janë dhe Pace Training mode apo Safety Check (vendosni një timer për aq minuta sa mendoni se do të arrini në shtëpi, dhe kur koha të përfundojë Pixel Watch do t’ju pyesë nëse gjithçka shkoi mirë).