Një operacion ndërkombëtar i policisë arriti të thyente sigurinë e një rrjeti kriminal, duke çuar kështu në arrestimin e qindra trafikantëve të drogës në shumë vende të ndryshme.
Telefonat Encro, të përdorur nga individë të përfshirë në krimin e organizuar, ofronin një sërë veçorish të krijuara për të mos lejuar aksesimin e mesazheve të shkruara nga policia. Klientët në EncroChat mund të fshinin lehtësisht memorien në telefonat e tyre dhe aksesimi i mesazheve në këto telefona mund të arrihej vetëm pas futjes së disa password tepër të komplikuara. Klientët duhej të paguanin 1500£ në muaj për shërbimin e ofruar nga një kompani holandeze e mesazheve telefonike. Megjithatë, rrjeti i koduar telefonik u infiltrua nga policia holandeze dhe franceze tre vjet më parë dhe që atëherë mijëra kriminelë në të gjithë Evropën janë arrestuar dhe ndjekur penalisht nga provat e zbuluara.
EncroChat më parë konsiderohej i pamundur për t’u hakuar, me kaq shumë shërbime sigurie saqë pajisjet shpesh ishin të padobishme kur kapeshin nga oficerët. Sidoqoftë, përmes një hetimi në fund të vitit 2019 nga policia franceze u zbulua një server i përdorur për të ruajtur të dhënat e EncroChat në qytetin e Roubaix.
Në shkurt të vitit të ardhshëm, autoritetet franceze dhe holandeze treguan se kishin zhvilluar një softëare që do të lejonte aksesimin e të dhënave nga EncroChat. Hakimi, i zbatuar nëpërmjet një update-i, mblodhi emrat e përdoruesve dhe mesazhet në celularët e tyre, si dhe vendndodhjen në të cilën ata përdoreshin përmes pikave të Wi-Fi. Rreth 60,000 përdorues të EncroChat janë identifikuar në mbarë botën që atëherë, me rreth 10,000 prej tyre në Mbretërinë e Bashkuar. Veprat penale të këtyre përdoruesve kanë përfshirë furnizimin me drogë dhe armë dhe pastrim parash.
