Studimi më i ri Automotive Performance, Execution and Layout nga JD Power tregon se kënaqësia e përgjithshme e drejtuesve të makinave ka rënë për herë të parë në histori dy vite radhazi.
Vlerësimi i kësaj ndjesie ka arritur në 845 pikë (nga 1000 të mundshme), 2 pikë më pak se një vit më parë dhe 3 pikë më pak se në vitin 2021. Problemi kryesor për drejtuesit e makinave duket se qëndron në sistemin infotainment të tyre.
Vetëm 55% e përdoruesve treguan se preferojnë të përdorin sistemet e integruara infotainment për të luajtur audio, një rënie e ndjeshme nga viti 2020 (70%). Gjithashtu për sa i përket shërbimeve si asistenti dixhital apo kryerja e telefonatave, ato janë dhe më pak të preferuara, pasi përdoren nga më pak se gjysma e përdoruesve.
“Rënia e njëpasnjëshme ndër vite mund të duket e vogël, por është një tregues se probleme më të mëdha mund të fshihen nën sipërfaqe,” tha Frank Hanley, drejtor i lartë në JD Power. “Kjo trajektore në rënie e kënaqësisë duhet të jetë një shenjë paralajmëruese për prodhuesit dhe ata duhet të kuptojnë më mirë se çfarë duan vërtet pronarët në automjetet e tyre të reja.”
Një pjesë interesante e studimit zbuloi se automjetet që kanë të integruar Android Automotive (AAOS) me Google Automotive Services (GAS) kanë rezultate më të mira në kategorinë e sistemeve infotainment sesa ato pa asnjë lloj AAOS. Sidoqoftë, AAOS pa GAS kishte rezultatet më të ulëta në këto kategori.
