Jack Ma, themeluesi i Alibaba Group dhe njëkohësisht ndër njerëzit më të pasur në botë, ka vizituar Tiranën për disa ditë. Nuk është bërë e ditur nëse vizita e tij ishte thjesht për qëllime turistike apo për biznes, por me shumë mundësi kjo vizitë ishte pjesë e një turi që Jack Ma kishte ndërmarrë për të vizituar shtete të ndryshme të Ballkanit dhe Evropës.
Është mësuar se më parë miliarderi kishte vizituar Sofjen dhe Shkupin, dhe më pasditen e 11 korrikut arriti në Shqipëri me avionin e tij privat.
Me sa duket Tirana ishte një ndër vendet që i pëlqyen më tepër Jack Ma, pasi dhe ai vetë e pohoi një gjë të tillë. Gjatë vizitës së tij në kryeqytet miliarderi gjeti kohën të vizitonte Pazarin e Ri, Bunkart dhe Muzeun Kombëtar, por gjithashtu dhe restorante të tjera mjaft të njohura. Ai tregoi se i kishte bërë përshtypje pastërtia e qytetit, dhe se mendon se do të vizitojë sërisht Shqipërinë në të ardhmen.
Vizita e Jack Ma përfundoi në 13 korrik gjatë pasdites, ku u largua sërisht me avionin e tij privat.
