Elon Musk tregoi të mërkurën se ka krijuar një kompani të re të fokusuar në inteligjencën artificiale. Duket se një plan i tillë ka qenë në mendjen e Musk prej kohësh, i cili dëshiron të krijojë një aplikacion rival me ChatGPT.
Kompania e re xAI do të udhëhiqet nga Musk, sipas faqes së internetit, dhe “do të punojë ngushtë me X (Twitter), Tesla dhe kompani të tjera për të bërë përparim drejt misionit tonë”.
Announcing formation of @xAI to understand reality
— Elon Musk (@elonmusk) July 12, 2023
“Qëllimi i xAI është të kuptojë natyrën e vërtetë të universit”, thuhet në website, duke i bërë jehonë ambicieve të Musk për AI. Musk ishte një mbështetës i hershëm i OpenAI, krijuesit të ChatGPT.
Musk e kishte paralajmëruar më parë krijimin e një kompanie të tillë në një intervistë me prezantuesin e atëhershëm të Fox News, Tucker Carlson, në prill. “Ne do të krijojmë diçka që unë e quaj TruthGPT,” tha ai, duke e përshkruar atë si një “Inteligjencë artificiale që bën maksimumin në kërkimin e së vërtetës” dhe që “kujdeset për të kuptuar universin“.
Megjithatë në një intervistë tjetër para disa muajsh ai u tregoi se AI mund të shkaktojë “shkatërrim qytetërimi” dhe iu bashkua udhëheqësve të tjerë të teknologjisë në thirrjen për një pauzë në zhvillimin e sistemeve AI të pakontrolluara.
Shumë të pakta janë detajet rreth këtij produkti të ri, por në faqjen e internetit tregohet se po rekrutohet në mënyrë aktive stafi. Për momentin, të gjithë punonjësit në website duket se janë meshkuj.
