Shkencëtarët në Tohoku University kanë arritur të zhvillojnë një prototip të ri baterie duke përdorur kalciumin. Kjo bateri është në gjendje të plotësojë rreth 500 cikle karikim-shkarkim, një nivel i pranueshëm në ditët e sotme.
Nevoja për bateri është rritur shumë gjatë kohëve të fundit falë rritjes së shitjeve të makinave elektrike, dhe tashmë ka nisur eksplorimi i alternativave të baterive me litium.
Zhvillimi është fokusuar kryesisht në elementin e kalciumit (Ca), elementi i 5-të më i pranishëm në sipërfaqjen e Tokës dhe që ka kosto shumë të pakta. Kalciumi ka gjithashtu veti që ndihmojnë transportimin e joneve si dhe shpërndarjen në elektrolite dhe katoda.
Megjithatë, sfida kryesore mbetet gjetja e një elektroliti efiçient si dhe materialeve që do të përdoren në katodë të cilat kanë aftësinë e ruajtjes së mjaftueshme të kalciumit. Ekipi i shkencëtarëve arriti të adresonte këtë problem duke zhvilluar një elektrolit të kalciumit pa fluor të bazuar në një grumbull hidrogjeni. Ky elektrolit shfaqi një performancë mjaft të përmirësuar elektrokimike pasi është tepër përçues si dhe ka një stabilitet të lartë.
Prototipi i kësaj baterie tregoi se arriti të ruante 92% të kapacitetit të saj dhe pas 500 ciklesh karikimi. Shkencëtarët tashmë besojnë se ky zbuloim do të kontribuojë në zhvillimin e materialeve të katodave të nevojshme për bateritë e kalciumit, të cilat mund të përfshihen mjaft mirë në makinat elektrike duke ulur më tepër koston e prodhimit të tyre.
