Kompanitë luksoze Bugatti dhe Binghatti kanë vendosur të bashkëpunojnë për të ndërtuar një qiellgërvishtës të ri në zemër të Dubait. Ndërtesa me 42 kate do të ketë një hapësirë shumë të madhe dhe do të reklamohet për personat më të pasur nga e gjithë bota.
Bugatti është një kompani që u themelua në 1909 si një prodhues i makinave luksoze, dhe njihet për makinat shumë të shpejta që prodhon, ndërsa Binghatti njihet për arkitekturën moderne.
Bugatti Residences do të ofrojë 171 rezidenca dhe 11 penthouses dhe që të gjitha do të kenë një dizajn të brendshëm dhe struktura arkitekturore unike. Në këtë ndërtesë ju do të mund të gjeni pishina private, xhakuzi spa, palestra, shërbyes privatë si dhe një klub privat për të gjithë anëtarët.
Megjithatë një ndër komoditetet më unike që do të ofrohen në këtë ndërtesë do të jetë ashensori i makinave, i cili do t’i ngjisë makinat e rezidentëve të penthouse deri në katet e fundit, që do të kenë gjithashtu hapësira për parkim.
Megjithatë ky nuk është një koncept tërësisht i ri, pasi Porsche e ka bërë diçka të tillë që në vitin 2013 kur ndërtoi Porsche Design Tower në Miami, me një ashensor për makinat për rezidentët.
Në një deklaratë për shtyp, Bugatti dhe Binghatti tregojnë se janë inspiruar nga riviera franceze për sa i përket plazheve të gjera dhe shërbimeve luksoze.
