Raportimet më të reja tregojnë se Sega është shumë pranë finalizimit të marrëveshjes për blerjen e Rovio Entertainment (kompania e cila krijoi lojën e famshme Angry Birds dhe shumë lojra të tjera) për një shumë prej $1 miliardë.
Është me të vërtetë interesant fakti se Sega do të shpenzojë një shumë kaq të madhe parash për Rovio Entertainment, duke ditur se gjatë viteve të fundit popullariteti i lojrave Angry Birds ka rënë. Loja origjinale ishte një sukses i vërtetë në vitin 2009. Në vitin 2016 kompania provoi të prodhonte filmin “The Angry Birds Movie” dhe arriti një sukses të vërtetë, dhe pse nuk u prit mirë nga të gjithë ndjekësit. Megjithatë “The Angry Birds Movie 2” nuk arriti të përsëriste suksesin e filmit të parë.
Më herët Rovio ishte pranë arritjes së një marrëveshje me zhvilluesin nga Izraeli, Playtika, për shifrën $800 milionë, mirëpo bisedat midis dy kompanive u ndërprenë në mars të këtij viti. Me Sega duket se diskutimet janë shumë më të avancuara.
Loja origjinale Angry Birds është loja e parë për smartphone e cila arriti shifrën 1 miliardë shkarkime, dhe Rovio tregoi se libraria e plotë e lojrave të publikuara arrin shifrat 5 miliardë shkarkime.
