Në një event të mbajtur sot në Athinë, Xiaomi prezantoi zyrtarisht Redmi Note 12 dhe Geek Room ishte aty për t’i zbuluar nga afër. Kjo seri mjaft e njohur përbëhet nga 4 pajisje të reja: Redmi Note 12 Pro+ 5G, Redmi Note 12 Pro 5G, Redmi Note 12 5G dhe Redmi Note 12 (që suporton rrjetin 4G).
Seria Redmi Note 12 dëshiron të përsërisë suksesin e serisë paraardhëse, duke bërë përmirësime të ndjeshme në sistemin e kamerave, baterinë apo shpejtësinë e karikimit, shërbime që kanë më tepër vlera për përdoruesit.
Redmi Note 12 Pro+ 5G
Redmi Note 12 Pro+ 5G është i pajisur me një sistem mjaft të fuqishëm kamerash. Kamera kryesore ka një rezolucion 200MP për të shkrepur fotografi me cilësi mjaft të lartë, ndërkohë që të pranishme janë dhe kamerat ultrawide si dhe ajo macro.
Pajisja do të ketë një ekran mjaft të ndritshëm AMOLED me refresh rate 120Hz, ekran që është i pranishëm dhe në Redmi Note 12 Pro 5G. Bateria e madhe me kapacitet 5,000mAh do të mund të karikohet shpejt falë karikueses 120W HyperCharge, që e karikon pajisjen plotësisht në vetëm 19 minuta.
Smartphone-i më i fuqishëm i kësaj serie do të kushtojë €499 për versionin bazë.
Redmi Note 12 Pro 5G
Njësoj si Note 12 Pro+ 5G, kjo pajisje do të fuqizohet nga proçesori MediaTek Dimensity 1080, dhe do të kushtojë €359 për versionin bazë. Note 12 Pro 5G është pajisur me një kamera kryesore 50MP, ndërkohë që bateria 5,000mAh karikohet shpejt me 67W.
Redmi Note 12 5G
Modeli bazë Note 12 5G do të kushtojë €269 dhe vjen me një konfigurim 4/128GB. Është e rëndësishme të përmendim se ky model ka të implementuar teknologjinë Gorilla Glass 3 në ekranin me refresh rate 120Hz, hapësirë për kartë memorie dhe një kamera ekstra 8MP. Bateria 5,000mAh karikohet shpejt me 33W, ndërkohë që proçesori Snapdragon 4 Gen 1 fuqizon pajisjen.
Redmi Note 12 (4G) do të fuqizohet nga proçesori Snapdragon 685 Mobile Platform, dhe do të kushtojë €199 për konfigurimin 4/64GB.
Një tjetër produkt i prezantuar gjatë këtij eventi është dhe Redmi Watch 3, një orë smart plot stil që ka një ekran tepër të qartë dhe ofron shërbime të ndryshme lidhur me aktivitetet sportive që ju kryeni në përditshmëri. Kjo orë smart kushton €109.
