Microsoft ka shtuar një tjetër aftësi të inteligjencës artificiale në motorin e kërkimit Bing, të quajtur “Bing Image Creator”. Ky shërbim do të fuqizohet nga një version i avancuar i modelit DALL-E dhe do të lejojë përdoruesit të krijojnë imazhe thjesht duke shkruar diçka në prompt.
“Për të gjithë përdoruesit e Bing, Bing Image Creator do të jetë i integruar plotësisht në eksperiencën e komunikimit me chatbot-in, duke qenë prezent fillimisht në modalitetin Creative.” shpjegon Yusuf Mehdi, drejtues i marketingut për konsumatorët në Microsoft. “Duke shkruar një përshkrim që dëshironi, duke shtuar kontekst në lidhje me vendndodhjen apo aktivitetin që po ndodh dhe duke zgjedhur një stil arti, Image Creator do të gjenerojë një imazh nga imagjinata juaj.”
Bing ka tre modalitete përgjigjesh: creative, balanced dhe precise. Modaliteti creative përfshin gjenerimin e përgjigjeve që janë “origjinale dhe plot imagjinatë”, ndërkohë që modaliteti precise ofron më tepër saktësi dhe fakte në përgjigje. Microsoft e ofron shërbimin e gjenerimit të imazheve në modalitetin creative për shkak të gjenerimit të disa përgjigjeve të vrazhda disa muaj më parë.
Nëse ju nuk jeni të pranishëm në Bing preview, ju mund të aksesoni këtë link të veçantë të Bing Image Creator bing.com/create për gjenerimin e imazheve nga teksti në gjuhën angleze. Microsoft tregon se do të shtojë suportin për gjuhë të tjera me kalimin e kohës.
