Autoritetet dhe linjat ajrore para çdo fluturimi kërkojnë nga pasagjerët fikjen e smartphone-ve ose aktivizimin e airplane mode gjatë fluturimit drejt një vendi tjetër. Arsyeja kryesore e këtij rekomandimi është interferimi i valëve elektromagnetike të emëtuara nga smartphone-t me sistemet e navigimit dhe të komunikimit të avionëve.
Dhe pse deri më tani nuk ka patur asnjë provë që vërteton se përdorimi i smartphone-ve ka shkaktuar një aksident ajror, është e rëndësishme që rregullat të ndiqen, pasi në të kundërt mund të ndëpriten sinjalet e dërguara në sistemin e komunikimit të avionit.
Periudhat më të rëndësishme dhe kritike të fluturimit janë nisja dhe ulja e avionit në pistë, dhe në këto çaste përdorimi i smartphone-ve jo vetëm që mund të krijojë interferenca me sistmet e komunikimit, por mund të shkaktojë dhe shpërqëndrimin e ekipit të punonjësve, duke vonuar kështu përgjigjen në gjendje emergjencash.
Dhe pse ju mund të mendoni se një gjë e tillë është shumë e papërshtatshme, është një sakrificë e vogël që e bën fluturimin shumë herë më të sigurtë për ju dhe pasagjerët e tjerë.
Është e rëndësishme që këto rregulla të ndiqen për të gjitha pajisjet, duke përfshirë këtu laptopët, tabletët, e-reader apo pajisje të tjera elektronike.
