Teknologjisë që ne përdorim në ditët e sotme do t’i vijë dhe dita që do të “vdesë”, dhe për fat të keq nuk ka shumë gjëra që mund të bëjmë për të shmangur këtë fenomen.
Me produktet që shiten në ditët e sotme, që i kanë komponentët të vështira për t’u aksesuar dhe të fshehur brenda një dizajni të bukur, ju nuk e keni nën pronësinë tuaj pajisjen që përdorni, thjesht keni rënë dakord ta përdorni atë sipas udhëzimeve të prodhuesit.
Shumë prodhues të ndryshëm nuk ju lejojnë ju ose specialistë të tjerë jo të autorizuar nga kompania që të ndërhyjnë dhe të rregullojnë problemet që këto pajisje shfaqin. Në këtë mënyrë sigurohet që kompania të përfitojë akoma më tepër para nga riparimet e pajisjeve.
Ky problem nuk ka prekur vetëm kompanitë që prodhojnë smartphone apo laptopë, por edhe makineritë e mëdha si traktorët. Kjo gjë i kushton shumë shtrenjtë përodruesve dhe krijon shumë mbetje elektronike të dëmshme për ambientin ku jetojmë, pasi për shkak të kostove të larta të riparimit, ne detyrohemi të blejmë një pajisje të re.
Për fat të mirë gjatë kohëve të fundit lëvizja për të drejtën e riparimit është rritur në mënyrë konstante dhe ka fituar një aleat të madh, Shtëpinë e Bardhë. Megjithatë ekzistojnë dhe kompani të ndryshme në treg si Framework, të cilat i kanë dizenjuar produktet e tyre me të drejtën e riparimit të plan të parë.
Këto dizajne të laptopëve Framework janë lehtësisht të riparueshme, dhe kanë si plan kryesor luftimin kundër kompanive të tjera duke krijuar një laptop që ka “një jetë më të gjatë”.
