Nanosys është një kompani e cila merret me zhvillimin e teknologjive të reja për ekranet që përdoren në ditët e sotme në miliona pajisje. Gjatë CES 2023, disa gazetarë patën fatin të njihen me një teknologji të re “top sekrete” e cila ka potencialin të zëvëndësojë teknologjinë OLED të ditëve të sotme.
Bëhet fjalë për teknologjinë “Electroluminescent quantum dots”, e cila është akoma më e avanvcuar se teknologjia “quantum dots” që përdoret në shumicën e TV në ditët e sotme. Kjo teknologji do të ofrojë cilësi më të mirë imazherike, kursim energjie dhe një efiçiencë të shtuar në proçesin e prodhimit. Struktura tepër e thjeshtë e këtyre ekraneve i bën ato shumë të thjeshtë për t’u prodhuar, duke ulur akoma më tepër çmimin e ekraneve cilësor.
Gazetarët të cilët ishin ftuar për të parë prototipet e kësaj teknologjie mbetën të mahnitur me cilësinë që panë. Prototipi i ekranit 6 inç dukej si një fletë tepër e ndriçuar, ku u shfaqën imazhe të ndryshme nga natyra.
Gjatë viteve të fundit kjo teknologji është përdorur gjerësisht në industrinë e TV për të përmirësuar ndriçimin dhe ngjyrën e TV LCD.
Teknologjia “quantum” e përdorur në ditët e sotme cilësohet si “photoluminescent”, absorbon dritën dhe më pas e emëtojnë atë. Në prototipin e ri gjithçka kishte ndryshuar. Në vend që të përdorej drita për të nxitur pikat kuantike që të emëtonin dritë, përdorej elektriciteti, prandaj dhe termi i ri për këtë teknologji është “electroluminescent”.
Teorikisht, kjo gjë do të ndihmojë në kursimin e energjisë dhe në uljen e kostos së prodhimit të ekraneve. Prandaj së shpejti ju do të nisni të shikoni në treg TV që reklamohen se kanë një panel “nanoLED”, që përdorin pikërisht teknologjinë “electroluiminescent quantum dots”.
