Për herë të parë në histori, Food and Drug Administration ka vendosur që t’i japë dritën jeshile prodhimit të mishit në laborator. Agjencia lajmëroi ditën e mërkurë se “mishi i pulës i kultivuar” që prodhohet nga Upside Foods është i sigurt për t’u konsumuar.
“FDA vlerësoi informacionet e dorëzuara në agjenci dhe nuk ka pyetur për më tepër detaje gjatë kësaj kohe rreth konkluzionit të sigurisë së kompanisë,” lexohet në deklaratën e FDA.
“Ky është një moment historik për ushqimin.” tha Uma Valeti, CEO dhe themeluese e kompanisë. “Konsumatorët nga SHBA shumë shpejt do të kenë mundësinë për të provuar mish tepër të shëndetshëm që rritet në mënyrë direkte nga qelizat e kafshëve.”
Qeliat nga një pulë e vetme mundësojnë kultivimin e të njejtës sasi mishi që vjen nga qindra e mijra zogj të rritur në ferma, sipas kompanisë. Dhe pse ushqimi i Upside Foods është vërtetuar si i sigurt për t’u konsumuar, produkti nuk është aprovuar ende për t’u shitur.
“Ndërkohë që produkti po i afrohet futjes në tregun e SHBA, ne po koordinohemi me USDA-FSIS për të siguruar se produktet janë tërësisht të rregulluar dhe etiketuar.” tha FDA.
Valeti është një kardiologe e cila themeloi Upside në 2015 pasi i erdhi në mendje idea e mishit të ashtuquajtur “të kultivuar” ndërkohë që punonte në klinikën Mayo ku rriteshin qeliza të zemrës humane në laborator.
