Prej shumë kohësh është diskutuar se Google do të vijë me një pajisje të palosshme, dhe tashmë janë zbuluar disa detaje të reja në lidhje me këtë pajisje. Sipas leak-ut më të ri, tregohet se kjo pajisje do të quhet Pixel Fold.
Data më e mundshme për prezantimin e këtij smartphone-i mund të jetë në maj të vitit të ardhshëm, në të njejtën kohë dhe me tabletin Pixel, gjatë konferencës së përvitshme I/O. Pixel Fold pritet të vijë në 2 ngjyra, që Google i quan Chalk (të bardhë) dhe Obsidian (të zezë).
Për të kuptuar më mirë se çfarë mund të presim nga kjo pajisje, janë krijuar disa renders të ndryshëm sipas ngjyrave përkatëse në 3D. Raportuesit e panjohur që bënë të ditura këto informacione pretendojnë se Pixel Fold do të ofrojë të njejtën eksperiencë si Pixel-at e tjerë dhe do të përfshijë kamera flagship.
Për të gjithë këto shërbime, pritet që Google të kërkojë një shumë prej $1,799, i njejti çmim me të cilin Samsung prezantoi Galaxy Z Fold 4 në gusht të këtij viti. Me sa duket konkurenca gjatë vitit të ardhshëm do të jetë akoma dhe më e fortë në tregun e pajisjeve të palosshme.
Përmes renders mund të shikojmë se ishulli i kamerave është disi më ndryshe se në Pixel 7, pasi nuk zgjerohet deri në këndet e pajisjes. Pixel Fold do të ketë 2 kamera selfie, një në ekranin e jashtëm në formën e hole punch dhe një në ekranin e brendshëm të fshehur në kornizat shumë të gjëra çuditërisht në ekranin e brendshëm.
