Gjatë kësaj jave Amazon u bë kompania e parë publike në histori që ka humbur mbi $1 trilion vlerë në treg. Ky rekord negativ u arrit gjatë ditës së mërkurë, kur vlera e kompanisë kapi shifrat $879 miliardë, ndërkohë që në korrik të 2021 kompania vlente $1.88 trilion.
Megjithatë deri në ditën e premte, kompania arriti të ringrihej duke kapur vlerën $1.02 trilion, por rekordi negativ tashmë ekziston.
Amazon nuk është kompania e vetme e cila po ndikohet nga situata e lëkundur ekonomike që pas rikthimit në normalitet nga COVID-19. Vlera në treg e Microsoft arriti maksimumin e saj në $2.5 trilionë dhe aktuallisht gjendet në shifrën $1.84 trilionë. Gjithashtu dhe Meta e cila kapi vlerën $1 trilion në gusht të vitit 2021, po përjeton situatën më të keqe në të gjithë historinë e saj, dhe për shkak të vendimeve të Mark Zuckerberg për fokusimin në metaverse.
CEO i Amazon, Andy Jassy lançoi gjatë kohëve të fundit një plan për të ulur kostot në kompani, i cili u bë i ditur përmes The Wall Street Journal. Këtu përfshihet ndalimi i përkohshëm apo i përhershëm i projekteve që nuk sjellin përfitime për kompaniën si dhe ndalimi i punësimit të personelit të ri.
