Ekipi ligjor i Elon Musk i është përgjigjur padisë së Twitter duke thënë se kompania po kërkon një gjykim tepër të shpejtë. Prandaj, ekipi ligjor kërkon që rasti të gjykohet gjatë vitit të ardhshëm në muajin shkurt.
Twitter kërkon që gjykimi të nisë menjëherë duke filluar nga mesi i muajit shtator, duke justifikuar kërkesën e tyre me faktin se Musk dhe Twitter kanë një marrëveshje për përfundimin e bisedave në datën 24 tetor. Megjithatë ekipi ligjor i Musk kërkon që gjyqi të shtyhet deri në datën 13 shkurt të vitit të ardshëm.
Twitter vendosi të padisë Elon Musk javën e kaluar pasi ai tentoi të tërhiqej nga marrëveshja prej $44 miliardë për të blerë Twitter. Pothuajse menjëherë pasi Elon tregoi se po mendonte të tërhiqej, anëtari i bordit në Twitter, Bret Taylor, tha se kompania do ta çojë këtë çështje në gjykatë.
Arsyeja kryesore se përse Elon Musk kërkon të tërhiqet nga marrëveshja për blerjen e Twitter është se kompania nuk i ka treguar atij të dhëna të sakta mbi sasinë e adresave spam që qarkullojnë në Twitter. Ky problem u ritheksua dhe gjatë dorëzimit të dokumenteve në ditën e premte, ku ekipi ligjor tregoi se “kërkesa për informacionin e saktë në lidhje me prezencën e adresave spam është shumë e rëndësishme në vlerën e Twitter.”
