TikTok tashmë është shndërruar në një rival jo vetëm për rrjetet sociale të ndryshme, por dhe për motorët e kërkimit.
Pothuajse 40% e “Gjeneratës Z” preferojnë të kërkojnë në TikTok apo Instagram për diçka në vend të Google Search apo Maps. Kjo gjë është bërë e ditur nga të dhënat e brendshme të Google, siç raportohet nga TechCrunch.
TikTok, i cili është rrjeti social që po rritet me shpejtësinë më të madhe ka rritur popullaritetin e tij kaq shumë gjatë viteve të fundit, saqë ka inspiruar dhe rrjetet e tjera sociale si Instagram apo Snapchat të krijojnë një kategori të re përmbajtjesh si Reels dhe Spotlight.
Zëvëndës presidenti i Google, Prabhakar Raghvan tregoi për Fortune Brainstorm Tech se sipas studimeve të brendshme të Google “pothuajse 40% e të rinjve kur kërkojnë për një vend për të pirë një kafe ose për të ngrënë drekë, i drejtohen TikTok dhe Instagram fillimisht dhe jo Google Maps.”
Gjithashtu Google tregoi se planifikon të bëjë disa ndryshime në motorin e kërkimit për t’iu përshtatur akoma më mirë të rinjve, duke përfshirë këtu dhe mundësinë për t’i ofruar përdoruesve të përdorin smartphone-in e tyre dhe të grumbullojnë në mënyrë të menjëhershme pamje të objekteve ndryshme në një kënd të gjërë.
