Së shpejti smartphone-i juaj do të bëhet dhe më i lidhur me aspektet jo-dixhitale të jetës tuaj. Ky është një ndër qëllimet kryesore të iOS 16 dhe Android 13, software-t e rinj që pritet të prezantohen së shpejti nga Apple dhe Google.
Kompanitë e mëdha teknologjike kërkojnë që smartphone-i juaj të shndërrohet në një portofol dixhital ku ju do të ruani dokumentet tuaja të identifikimit dhe dokumente të tjera të rëndësishme. Gjithashtu smartphone-i do të krijojë një lidhje më të mirë me makinën tuaj, duke u përdorur dhe si një çelës për hapjen dhe ndezjen e tyre.
Apple prezantoi gjatë WWDC 2022 versionin e ri të CarPlay i cili do të vijë me iOS 16. Tashmë smartphone-i juaj do të jetë në gjendje të mbivendoset mbi sistemin infortainmet të makinës tuaj, duke ju ofruar një eksperiencë të re kontrolli më të personalizuar të shoqëruar nga ikonat dhe widgets të iOS.
Një tjetër shërbim i prezantuar nga Apple ishte dhe “Apple Pay Later”, e cila e ndan koston e një blerje në 4 pagesa të tjera të barabarta që duhet të kryhen përgjatë 6 javëve.
Nga ana tjetër Google prezantoi një përmirësim të madh të aplikacionit Wallet gjatë konferencës I/O muajin e kaluar. Në këtë portofol ju do të keni mundësinë të ruani dokumente personale si patenta, pagesat apo kartat e tranzitit, çertifikatën e vaksinimit, fletëhyrjet apo Student ID.
