Apple do të duhet të ndërrojë portën karikuese në të gjitha pajisjet iPhone që do të shesë në Evropë duke filluar nga viti 2024 pasi politikanët e Bashkimit Evropian ranë dakord që të lejohet përdorimi i vetëm një lloji porte karikuese për të gjitha pajisjet si smartphone-t, tabletët dhe kamerat.
Komisioni Evropian tha se kjo lëvizje do ta bëjë jetën më të thjeshtë për të gjithë përdoruesit dhe do t’iu kursejë atyre para. Kjo është ndërhyrja e parë politike e bërë pasi kompanitë nuk arritën dot në një marrëveshje të përbashkët.
“Duke nisur nga shtatori i vitit 2024, USB Type C do të jetë zgjidhja e përbashkët për karikimin e pajisjeve elektronike në BE” u tha në deklaratën e Parlamentit Evropian.
Shefi i industrisë Thierry Breton shtoi se përmes kësaj marrëveshje përdoruesit do të kursejnë rreth $372 milionë. “Kjo gjë do të lejojë gjithashtu teknologjitë e reja si karikimi wireless të maturohen pa lejuar inovacionin të shërbejë si një burim për copëzimin e tregut dhe shqetësimin e qytetarëve.”
Impakti më i madh i këtij vendimi do të jetë për Apple, pasi kjo kompani përdor ende portat Lightning për karikimin e iPhone-ve, ndërkohë që shumica e prodhuesve të smartphone-ve Android po përdorin prej vitesh USB-C.
