Tashmë ju mund të jeni pronar i një copëze të historisë së Apple, e cila është e firmosur dhe nga vetë Steve Wozniak, për sa kohë portofoli juaj mund të përballojë këtë çmim marramendës.
Kompjuteri legjendar Apple-1, i krijuar për herë të parë nga Wozniak dhe Steve Jobs në garazhin e familjes së Jobs, ka dalë në ankand. Ai është funksional, me të gjitha pjesët dhe në gjendje shumë të mirë. Problemi kryesor është se ju duhet të paguani rreth $500,000 për ta bërë tuajin këtë kompjuter.
Apple-1 është kompjuteri i parë i krijuar nga Apple në 1976 dhe u shit për një çmim prej $666.66. Vetëm 200 pajisje të tilla u krijuan para se kompania të vazhdonte para me Apple II, dhe nga 200 të prodhuara shumë pak janë ende funksionalë. Kjo është arsyeja se përse çmimi i pajisjes është kaq i lartë.
Aktualisht kompjuteri është nën pronësinë e AAPL Collection. Ky kompjuter njihet gjithashtu dhe si “Schlumberger 2” pasi ai iu shit një kompanie të quajtur Schlumberger Overseas në 1977, dhe me shumë mundësi është ndër kompjuterët e fundit që Apple krijoi në garazhin e Steve Jobs.
Kompjuteri vjen i shoqëruar nga teknologji të vjetra që i përkasin viteve 1970 si monitori Sanyo dhe regjistruesi i kasetave Panasonic.
