Car Key është një shërbim relativisht i ri nga Apple, i cili u prezantua në vitin 2020, dhe funksionon në të gjitha pajisjet iPhone X ose Apple Watch Series 5 dhe modelet më të reja të tyre. Fillimisht ky shërbim ishte i limituar për disa modele makinash BMW, por tashmë ai po mbështetet dhe nga kompani të tjera.
Drejtimi në gjendje të dehur i makinës vret një person çdo 52 minuta në SHBA, prandaj Apple ka menduar të krijojë një shërbim të ri për Car Key, ku do të refuzohet hapja e makinës nëse përdoruesi është në gjendje të dehur.
Mirëpo si do ta kuptojë pajisja juaj nëse ju jeni të dehur?
Në aplikimin për patentim të Apple shpjegohet se si shërbimi i ri i Car Key do të komunikojë me pajisjen që analizon frymën tuaj për alkool. Nëse shifrat e gjeneruara nga ky lexues do të jenë të larta, Car Key do të refuzojë të hapë dyert e makinës tuaj, ose do të lejojë që ju të futeni në makinë por do të pengojë ndezjen e saj.
Në SHBA personat e dënuar për drejtim të mjetit në gjendje të dehur, mund të detyrohen të përdorin një pajisje që analizon frymën për prezencën e alkoolit. Pajisja instalohet në makinën e përdoruesit, dhe bën të pamundur që makina të ndizet nëse vlerat e alkoolit janë më të larta se ato të lejuara.
